കൊവിഡ് അതിതീവ്ര വ്യാപനം; തലസ്ഥാനം സി കാറ്റഗറിയിൽ,​ കടുത്ത നിയന്ത്രണം ഏർപ്പെടുത്തി,​ തിയേറ്ററുകൾ,​ ജിമ്മുകൾ എന്നിവ അടച്ചിടണം,​ ആരാധനാലയങ്ങളിലും നിയന്ത്രണം

തിരുവനന്തപുരം: കൊവിഡ് അതി തീവ്ര വ്യാപനം തുടരുന്ന തിരുവനന്തപുരം ജില്ല കടുത്ത നിയന്ത്രണങ്ങളിലേക്ക്. ജില്ലയെ കൊവിഡ് ' സി' കാറ്റഗറിയിൽ ഉൾപ്പെടുത്തി. സി കാറ്റഗറിയിൽ വരുന്ന ആദ്യ ജില്ലയാണ് തിരുവനന്തപുരം. എട്ട് ജില്ലകളെ ബി കാറ്റഗറിയിൽ ഉൾപ്പെടുത്തിയിട്ടുണ്ട്. കൊല്ലം , തൃശ്ശൂർ , എറണാകുളം, വയനാട്, ഇടുക്കി പാലക്കാട് ആലപ്പുഴ, പത്തനംതിട്ട ജില്ലകളാണ് ബി കാറ്റഗറിയിലുള്ളത്. ഇന്ന് ചേർന്ന കൊവഡ് അവലോകന യോഗത്തിലാണ് ഇത് സംബന്ധിച്ച് തീരുമാനമെടുത്തത്.

തലസ്ഥാനത്ത് പൊതു പരിപാടികൾക്ക് നിയന്ത്രണമേർപ്പെടുത്തി. മതപരമായ ചടങ്ങുകൾ ഓൺലൈനിൽ മാത്രമേ നടത്താൻ പാടുള്ളു. തിയേറ്ററുകൾ,​ ജിമ്മുകൾ ,​ നീന്തൽ കുളങ്ങൾ എന്നിവ അടച്ചിടണം. 10, 11 , 12 ക്ലാസുകൾ ഓഫ് ലൈനായി നടക്കുന്നതിനാൽ കൂടുതൽ കരുതൽ വേണം. സ്കൂളുകളിൽ 40% ഇൽ കൂടുതൽ കുട്ടികൾക്ക് രോഗം ഉണ്ടായാൽ പ്രഥമാദ്ധ്യാപകന് സ്കൂൾ അടച്ചിടാം. ബിരുദ -ബിരുദാനന്തര കോഴ്സുകളിൽ അവസാന വർഷ ക്ലാസുകൾക്ക് മാത്രമേ ഓഫ് ലൈൻ അനുവദിക്കുകയുള്ളൂ.