ഒറ്റപ്പെടൽ ആനകളിലും വില്ലൻ

ഹെൽസിങ്കി : വിഷാദം, മാനസിക സമ്മർദ്ദം, ഉത്കണ്ഠ തുടങ്ങിയ പ്രശ്നങ്ങൾ നമ്മുടെ സമൂഹത്തിൽ നിരവധി പേരെ അലട്ടുന്ന പ്രശനങ്ങളാണ്. എന്നാൽ, ഈ മാനസിക പ്രശ്നങ്ങൾ മനുഷ്യരെ മാത്രമല്ല ആനകളെയും ബാധിക്കുന്നതായി കണ്ടെത്തൽ. കൂട്ടത്തിൽ നിന്നകന്ന് തനിച്ച് കഴിയുമ്പോൾ ആനകളിൽ മാനസിക സമ്മർദ്ദവും ഉത്കണ്ഠയും അനുഭവപ്പെടാറുണ്ടെന്നാണ് ഫിൻലൻഡിലെ യൂണിവേഴ്സിറ്റി ഒഫ് ടൂർകു നടത്തിയ പഠനത്തിന്റെ റിപ്പോർട്ടിൽ പറയുന്നത്. ആൺ ആനകളിലാണ് ഒറ്റപ്പെട്ട് കഴിയുമ്പോൾ സമ്മർദ്ദം കൂടുന്നതായി കണ്ടെത്തിയത്. പിടിയാനകളിൽ കുട്ടിയാനകളുടെ സാമീപ്യം സമ്മർദ്ദത്തിന്റെ അളവ് കുറയ്ക്കുന്നു. മ്യാൻമറിലെ ഏഷ്യൻ ആനകളിലെ സ്ട്രേസ് ഹോർമോണുകളിൽ നടത്തിയ താരതമ്യ പഠനത്തിൽ നിന്നാണ് ഇത്തരമൊരു നിഗമനം. 95 ആനകളെയാണ് ഗവേഷക സംഘം പഠനവിധേയമാക്കിയത്. ഒറ്റപ്പെട്ട് കഴിയേണ്ടി വരുന്ന ആനകളുടെ ക്ഷേമത്തിനായുള്ള മാർഗങ്ങൾ കണ്ടെത്താൻ പഠനം സഹായിക്കുമെന്നാണ് ഗവേഷകർ പറയുന്നത്.