തൃശൂർ: കാർ കയറ്റി കൊല്ലാൻ ശ്രമിച്ചുവെന്ന യു.ഡി.എഫ് കൗൺസിലർമാരുടെ പരാതിയിൽ തൃശൂർ കോർപ്പറേഷൻ മേയർക്കെതിരെ വധശ്രമത്തിന് രജിസ്റ്റർ ചെയ്ത കേസ് റദ്ദാക്കും. പരാതിയിൽ കഴമ്പില്ലെന്നും കൗൺസിലർമാർക്കെതിരെ വധശ്രമം നടന്നിട്ടില്ലെന്നുമുള്ള പൊലീസ് റിപ്പോർട്ടിന്റെ അടിസ്ഥാനത്തിലാണ് മേയർ എം.കെ.വർഗീസിനെതിരായ വധശ്രമക്കേസ് റദ്ദാക്കുന്നത്.
എഫ്.ഐ.ആർ റദ്ദാക്കണമെന്ന് ആവശ്യപ്പെട്ട് പൊലീസ് കോടതിയിൽ റിപ്പോർട്ട് സമർപ്പിച്ചു. മേയറുടെ ഡ്രൈവർ മനഃപൂർവം കാർ ഓടിച്ച് കയറ്റിയതല്ലെന്നാണ് റിപ്പോർട്ട്. ഓടിത്തുടങ്ങിയ വാഹനത്തിന് മുന്നിൽ കൗൺസിലർമാർ തടസം ഉണ്ടാക്കുകയായിരുന്നെന്നും പറയുന്നു.
അതുകൊണ്ട് വധശ്രമം നിലനിൽക്കില്ലെന്നാണ് പൊലീസ് ചൂണ്ടിക്കാട്ടിയത്. മേയർക്കും ഡ്രൈവർ ലോറൻസിനുമെതിരെ കൊലപാതക ശ്രമത്തിനാണ് തൃശൂർ ഈസ്റ്റ് പൊലീസ് കേസെടുത്തത്.
ജാമ്യമില്ലാ വകുപ്പ് പ്രകാരം എഫ്.ഐ.ആർ രജിസ്റ്റർ ചെയ്ത കേസാണ് കഴമ്പില്ലെന്ന് തെളിഞ്ഞതോടെ റദ്ദാക്കുന്നത്. കുടിവെള്ളത്തിൽ ചെളിവെള്ളം കലരുന്നതിനെ ചൊല്ലിയായിരുന്നു പ്രതിപക്ഷം ഒന്നടങ്കം പ്രതിഷേധിച്ചത്. കോർപറേഷന് മുന്നിൽ തടഞ്ഞ യു.ഡി.എഫ് കൗൺസിലർമാർക്ക് നേരെ മേയർ കാർ കയറ്റി കൊലപ്പെടുത്താൻ ശ്രമിച്ചുവെന്നായിരുന്നു പരാതി. അതേസമയം, കോർപ്പറേഷൻ കൗൺസിൽ നടക്കുന്നതിനിടെ തൃശൂർ മേയറെ കൊലപ്പെടുത്താൻ ശ്രമിച്ചുവെന്ന പരാതിയിൽ കൗൺസിലർമാരായ രാജൻ പല്ലൻ, ജോൺ ഡാനിയേൽ, ലാലി ജെയിംസ്, ശ്രീലാൽ ശ്രീധർ, എ.കെ.സുരേഷ് എന്നിവർക്കെതിരെ കേസെടുത്തിരുന്നു. പെട്രോളുമായി കൗൺസിൽ യോഗത്തിനെത്തിയെന്ന ആക്ഷേപത്തിലാണ് കേസ്. ഈ കേസുമായി ബന്ധപ്പെട്ട അന്വേഷണത്തിലാണ് പൊലീസ് . ഇതിനിടയിലാണ് മേയർക്കെതിരായ കേസ് നിലനിൽക്കില്ലെന്ന് പൊലീസ് നിലപാടെടുത്തത്.
സാമ്പത്തിക സെമിനാർ ഇന്ന്
തൃശൂർ: ബാങ്ക് എംപ്ലോയിസ് ഫെഡറേഷൻ ഒഫ് ഇന്ത്യ (ബെഫി) സംസ്ഥാന സമ്മേളനത്തിന്റെ ഭാഗമായി ഇന്ന് വൈകിട്ട് 5.15ന് സാഹിത്യ അക്കാഡമി ഹാളിൽ 'എൽ.ഐ.സി ഓഹരി വിൽപനയും ബാങ്ക് സ്വകാര്യവത്കരണവും-ഇന്ത്യ എങ്ങോട്ട്' എന്ന വിഷയത്തിൽ സാമ്പത്തിക സെമിനാർ നടത്തും. ടി.എൻ.പ്രതാപൻ എം.പി ഉദ്ഘാടനം ചെയ്യും. എ.ഐ.ഐ.ഇ.എ വൈസ് പ്രസിഡന്റ് പി.പി.കൃഷ്ണൻ, ബെഫി ജോയിന്റ് സെക്രട്ടറി സി.രാജീവൻ എന്നിവർ പ്രഭാഷണം നടത്തും. സമ്മേളനത്തിന്റെ പ്രചാരണാർത്ഥം നാളെ 5.15ന് വടക്കാഞ്ചേരിയിൽ നിന്ന് ആരംഭിക്കുന്ന വാഹന കലാജാഥ സേവ്യർ ചിറ്റിലപ്പിള്ളി എം.എൽ.എ ഉദ്ഘാടനം ചെയ്യും. പ്രധാന കേന്ദ്രങ്ങളിലെ പര്യടന ശേഷം 22ന് വൈകിട്ട് തൃശൂർ കോർപറേഷൻ ഓഫിസിന് മുൻപിൽ സമാപിക്കുന്ന ജാഥ മുരളി പെരുനെല്ലി എം.എൽ.എ ഉദ്ഘാടനം ചെയ്യുമെന്ന് ബെഫി സംസ്ഥാന പ്രസിഡന്റ് ടി.നരേന്ദ്രൻ, സംസ്ഥാന ജോയിന്റ് സെക്രട്ടറി ജെറിൻ കെ.ജോൺ, സംസ്ഥാന കമ്മിറ്റിയംഗം പി.കെ.വിപിൻകുമാർ, ജില്ലാ സെക്രട്ടറി ബി.സ്വർണകുമാർ, എൽ.ഐ.സി.ഇ.യു ഡിവിഷനൽ സെക്രട്ടറി ദീപക് വിശ്വനാഥ് എന്നിവർ പറഞ്ഞു.
പാചകത്തൊഴിലാളി യൂണിയൻ മാർച്ച്
തൃശൂർ: സംസ്ഥാന സ്കൂൾ പാചകത്തൊഴിലാളികളുടെ അടിയന്തര പ്രാധാന്യമുള്ള ആവശ്യങ്ങൾ ഉൾക്കൊള്ളുന്ന അവകാശപത്രിക അംഗീകരിക്കണമെന്ന് ആവശ്യപ്പെട്ട് സ്കൂൾ പാചകത്തൊഴിലാളി യൂണിയൻ (എ.ഐ.ടി.യു.സി) 21ന് തൃശൂർ വിദ്യാഭ്യാസ ഉപഡയറക്ടറുടെ ഓഫിസിലേക്ക് മാർച്ച് നടത്തും. സർക്കാർ പ്രഖ്യാപിച്ച മിനിമം കൂലി വിജ്ഞാപനം കാലോചിതമായി പരിഷ്കരിക്കുക, അവധിക്കാല അലവൻസ് പുന:സ്ഥാപിക്കുക, സാമൂഹിക സുരക്ഷാപദ്ധതികൾ ഏർപ്പെടുത്തുമെന്ന വാഗ്ദാനം നടപ്പാക്കുക എന്നിവയാണ് മറ്റ് ആവശ്യങ്ങൾ. രാവിലെ 11ന് എ.ഐ.ടി.യു.സി ജില്ലാ പ്രസിഡന്റ് ടി.കെ.സുധീഷ് മാർച്ച് ഉദ്ഘാടനം ചെയ്യുമെന്ന് യൂണിയൻ സംസ്ഥാന ജനറൽ സെക്രട്ടറി പി.ജി.മോഹനൻ, ജില്ലാ സെക്രട്ടറി സി.കെ.ലതിക, പ്രസിഡന്റ് സി.യു.ശാന്ത, എക്സിക്യൂട്ടീവ് അംഗം ബാബു ചിങ്ങാരത്ത് എന്നിവർ പറഞ്ഞു.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |