തൃശൂർ: ഓടിക്കൊണ്ടിരുന്ന കെ എസ് ആർ ടി സി ബസിന് തീപിടിച്ചു. തൃശൂർ - കോട്ടയം സൂപ്പർഫാസ്റ്റിനാണ് തൃശൂർ പുഴയ്ക്കലിൽ വച്ച് തീപിടിച്ചത്. ഓടിയെത്തിയ നാട്ടുകാർ ഉടൻ തീയണച്ചതിനാൽ വൻ ദുരന്തം ഒഴിവാകുകയായിരുന്നു. യാത്രക്കാരെല്ലാം സുരക്ഷിതരാണ്.
ഓടിക്കൊണ്ടിരിക്കെ ബസിന്റെ മുന്നിൽ എൻജിന്റെ ഭാഗത്തുനിന്ന് പുക ഉയരുകയായിരുന്നു. യാത്രക്കാരിൽ ഒരാളാണ് ജീവനക്കാരെ ഇക്കാര്യം അറിയിച്ചത്. ഉടൻ ബസ് ജീവനക്കാർ സമയോചിതമായി ഇടപെടുകയായിരുന്നു. നാട്ടുകാരും ഓടിയെത്തി യാത്രക്കാരെ പുറത്തിറക്കി. തൊട്ടുടുത്തുള്ള പെട്രോൾ പമ്പിൽ നിന്ന് തീണയ്ക്കാനുള്ള ഉപകരണം നാട്ടുകാർതന്നെ എത്തിച്ച് തീ അണയ്ക്കുകയും ചെയ്തു. ഇതിനിടെ അഗ്നിശമന സേനയും സ്ഥലത്തെത്തി. മുപ്പത് യാത്രക്കാരാണ് ബസിൽ ഉണ്ടായിരുന്നത്.
ഷോർട്ട് സർക്യൂട്ടാണ് തീപിടിത്തത്തിന് കാരണമെന്നാണ് പ്രാഥമിക നിഗമനം. ബസിന്റെ അടിഭാഗത്തുള്ള വയറിംഗിൽ നിന്നാണ് തീ പടർന്നതെന്നാണ് കരുതുന്നത്.
കഴിഞ്ഞയാഴ്ചയാണ് കണ്ണൂരിൽ ഓടിക്കൊണ്ടിരുന്ന കാർ കത്തി പൂർണ ഗർഭിണിയും ഭർത്താവും മരിച്ചത്. അതിനുശേഷം സംസ്ഥാനത്തെ ചില ഭാഗങ്ങളിൽ കാറുകൾ കത്തിയിരുന്നു. ഷോർട്ട് സർക്യൂട്ടായിരുന്നു ഇതിൽ പലതിനും കാരണമായത്.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |