ഈറോഡ്: തന്നെ വഞ്ചിച്ച് മറ്റൊരു യുവതിയുമായി വിവാഹനിശ്ചയത്തിനൊരുങ്ങിയ ഇരുപത്തേഴുകാരനുമേൽ തിളച്ച എണ്ണയൊഴിച്ച കാമുകിയെ പൊലീസ് അറസ്റ്റുചെയ്തു. തമിഴ്‌നാട് ഈറോഡ് സ്വദേശി മീനാദേവിയാണ് അറസ്റ്റിലായത്. ഗുരുതരമായി പരിക്കേറ്റ കാമുകൻ കാർത്തി ആശുപത്രിയിൽ ചികിത്സയിലാണ്.

മീനാദേവിയും കാർത്തിയും ബന്ധുക്കളാണ്. പെരുന്തുരയിലെ സ്വകാര്യ സ്ഥാപനത്തിൽ ജാേലിചെയ്യുന്ന കാർത്തി മീനയുമായി കുറച്ചുനാൾ മുമ്പാണ് പ്രണയത്തിലായത്. വിവാഹം കഴിക്കാമെന്ന് കാർത്തി വാക്കുതന്നിരുന്നു എന്നാണ് മീനാദേവി പറയുന്നത്. ഇതിനിടെ മറ്റൊരു യുവതിയുമായി കാർത്തിയുടെ വിവാഹം ഉറപ്പിച്ചു. വീടിന് സമീപത്തുവച്ച് ഇതിനെക്കുറിച്ച് മീനാദേവി കാർത്തിയോട‌് ചോദിച്ചു.

ആദ്യമൊക്കെ ഒഴിഞ്ഞുമാറാൻ കാർത്തി ശ്രമിച്ചെങ്കിലും മീനാദേവി വിട്ടുകൊടുത്തില്ല. ഇതോടെ ഇരുവരും തമ്മിൽ തർക്കമായി. തർക്കം മൂത്തതോടെയാണ് മീനാദേവി തിളച്ച എണ്ണ കാർത്തിയുടെ ശരീരത്തിലൊഴിച്ചത്. മുഖത്തും കൈകളിലുമാണ് മാരകമായി പൊള്ളലേറ്റത്. നിലവിളി കേട്ടെത്തിയ അയൽക്കാരാണ് ആശുപത്രിയിലെത്തിച്ചത്. മീനാദേവിയെ പൊലീസ് അറസ്റ്റുചെയ്തു.താൻ കാമുകന് മേൽ എണ്ണയൊഴിച്ചെന്ന് മീനാദേവി സമ്മതിച്ചിട്ടുണ്ട്. സംഭവത്തെക്കുറിച്ച് വിശദമായി അന്വേഷണം നടത്താനുള്ള തീരുമാനത്തിലാണ് പൊലീസ്.