നിർമ്മാണത്തിനിടെ കോളേജ് കെട്ടിടത്തിന്റെ മേൽക്കൂര തകർന്നു

ഹരിപ്പാട്: കാർത്തികപ്പള്ളി ഐ.എച്ച്.ആർ.ഡി കോളജ് കെട്ടിടത്തിന്റെ നിർമ്മാണത്തിനിടെ മേൽക്കൂരയുടെ ഭാഗം തകർന്നുവീണു,​ തൊഴിലാളിക്ക് പരിക്കേറ്റു. ഇന്നലെ വൈകുന്നേരം നാലരയോടെ കെട്ടിടത്തിന്റെ മൂന്നാം നിലയുടെ മേൽക്കൂര കോൺക്രീറ്റ് ചെയ്യുന്നതിനിടെയാണ് ഒരു ഭാഗം നിലം പൊത്തിയത്. വൈബ്രേറ്റർ ഉപയോഗിച്ച് കോൺക്രീറ്റ് ഉറപ്പിക്കുന്നതിനിടെ ബീമിന് സ്ഥാനചലനം സംഭവിക്കുകയും താങ്ങുകൾ തെറ്റി മേൽക്കൂരയുടെ ഭാഗം താഴേക്ക് പതിക്കുകയുമായിരുന്നു. താഴെ ജോലി ചെയ്തുകൊണ്ടിരുന്ന തൊഴിലാളിക്കാണ് പരിക്കേറ്റത്. ഇയാളുടെ നെറ്റിക്ക് രണ്ടു തുന്നലുകളുണ്ട്. സംഭവ സമയം പി.ഡബ്ല്യൂ.ഡി. ഉദ്യോഗസ്ഥരും സ്ഥലത്തുണ്ടായിരുന്നു. അപകടത്തെത്തുടർന്ന് കെട്ടിടത്തിന്റെ നിർമാണ പ്രവർത്തനങ്ങൾ താത്കാലികമായി നിർത്തിവച്ചു. നിർമാണത്തിലെ പിഴവാണോ അപകടത്തിന് കാരണമെന്ന് പരിശോധിക്കുന്നുണ്ട്.