പ്രകൃതി സംരക്ഷണ പദ്ധതിക്ക് രൂപം നൽകണം: മുരളി തുമ്മാരുകുടി

കൊച്ചി: കേരളത്തിലെ ഭൂപ്രകൃതിയുടെ സവിശേഷതകൾ കണക്കിലെടുത്ത് തീരത്തിനും ഇടനാടിനും മലനാടിനും യോജിക്കുന്ന വിധം പ്രകൃതി സംരക്ഷണ പദ്ധതിക്ക് രൂപം നൽകണമെന്ന് യു.എൻ ദുരന്ത ലഘൂകരണ വിഭാഗം മേധാവി മുരളി തുമ്മാരുകുടി അഭിപ്രായപ്പെട്ടു. ഗാഡ്ഗിൽ കമ്മിഷൻ റി​പ്പോർട്ട് ഒരു പുനർവായന എന്ന വിഷയത്തിൽ എ.ഐ.വൈ.എഫ് എറണാകുളം ജില്ലാ കൗൺസിൽ സംഘടിപിച്ച സംവാദം ഉദ്ഘാടനം ചെയ്യുകയായിരുന്നു അദ്ദേഹം.

ഭൂവിനിയോഗ കാര്യത്തിൽ നിയന്ത്രണങ്ങൾ വരുമ്പോൾ പ്രതികരണങ്ങൾ ഉണ്ടാവുക സ്വാഭാവി​കമാണ്. ഇതിന്റെ പേരിൽ ഹൈറേഞ്ചിലുള്ളവർ പ്രകൃതി സംരക്ഷണത്തിന് എതിരാണെന്ന് സ്ഥാപിക്കാൻ നടക്കുന്ന നീക്കങ്ങൾ ശരിയല്ല. ദുരന്ത നിവാരണം എന്നതിനപ്പുറം പ്രകൃതി സംരക്ഷണത്തിനാണ് മുൻകൈ എടുക്കേണ്ടത് - മുരളി തുമ്മാരുകുടി പറഞ്ഞു.

ജില്ലാ പ്രസിഡന്റ് പി.കെ. രാജേഷ് അദ്ധ്യക്ഷത വഹിച്ചു അഡ്വ ഹരീഷ് വാസുദേവൻ, ഡോ. ജിഡി മാർട്ടിൻ, കെ.എൻ.സുഗതൻ, ടി.സി.സഞ്ജിത്ത്, എൻ.അരുൺ, കെ.ആർ.റെനീഷ്, രേഖാ ശ്രീജേഷ്, കെ.എസ്. ജയ്ദീപ് തുടങ്ങിയവർ സംസാരിച്ചു.