ലോസാഞ്ചലസ് : ഓസ്കാർ ജേതാവായ അമേരിക്കൻ നടൻ വില്യം ഹർട്ട് ( 71 ) അന്തരിച്ചു. 1980കളിൽ ഏറെ ശ്രദ്ധനേടിയ ചിത്രങ്ങൾ മുതൽ സമീപകാല മാർവൽ സിനിമകളിൽ വരെ വില്യം ഹർട്ട് അഭിനയിച്ചിട്ടുണ്ട്. ' കിസ് ഒഫ് ദ സ്പൈഡർ വുമൻ " എന്ന ചിത്രത്തിലെ അഭിനയത്തിന് 1986ലാണ് ഹർട്ടിന് മികച്ച നടനുള്ള ഓസ്കാർ ലഭിച്ചത്. ' ചിൽഡ്രൻ ഒഫ് എ ലെസർ ഗോഡ് ", ' ബ്രോഡ്കാസ്റ്റ് ന്യൂസ് ", ' എ ഹിസ്റ്ററി ഒഫ് വയലൻസ് " എന്നീ ചിത്രങ്ങളിലെ പ്രകടനത്തിനും ഓസ്കാർ നോമിനേഷനുകൾ ലഭിച്ചു. അഞ്ച് മാർവൽ ചിത്രങ്ങളിൽ ജനറൽ താഡിയസ് ' തണ്ടർബോൾട്ട് " റോസ് എന്ന കഥാപാത്രത്തെ അവതരിപ്പിച്ച് ശ്രദ്ധനേടി. 72ാം പിറന്നാളിന് ഒരാഴ്ച ബാക്കി നിൽക്കെയാണ് ഹർട്ടിന്റെ അന്ത്യം. അദ്ദേഹത്തിന് ഏറെ നാളായി ആരോഗ്യപ്രശ്നങ്ങളുണ്ടായിരുന്നു. 2018 തനിക്ക് ക്യാൻസർ സ്ഥിരീകരിച്ചെന്ന് അദ്ദേഹം അറിയിച്ചിരുന്നു. 1980ൽ ' അൾട്ടേഡ് സ്റ്റേറ്റ്സ് " എന്ന ചിത്രത്തിലൂടെയാണ് ഹർട്ടിന്റെ കരിയർ ആരംഭിച്ചത്. മികച്ച പുതുമുഖത്തിനുള്ള ഗോൾഡൻ ഗ്ലോബ് നോമിനേഷൻ ഇതിന് ലഭിച്ചിരുന്നു. ഐ വിറ്റ്നസ്, ബോഡി ഹീറ്റ്, ലോസ്റ്റ് ഇൻ സ്പേസ്, എ.ഐ ആർട്ടിഫിഷ്യൽ ഇന്റലിജൻസ്, ദ ഗുഡ് ഷെപ്പേഡ്, ഇൻറ്റു ദ വൈൽഡ്, ദ ഇൻക്രെഡിബിൾ ഹൾക്ക്, റോബിൻ ഹുഡ്, ക്യാപ്ടൻ അമേരിക്ക സിവിൽ വാർ, അവഞ്ചേഴ്സ് : ഇൻഫിനിറ്റി വാർ, അവഞ്ചേഴ്സ് : എൻഡ്ഗെയിം, ബ്ലാക്ക് വിഡോ, ദ കിംഗ്സ് ഡോട്ടർ തുടങ്ങിയവയാണ് പ്രധാന ചിത്രങ്ങൾ. നിരവധി ടെലിവിഷൻ സീരീസുകളിലും അഭിനയിച്ചു.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |