കൊല്ലം: ട്രഷറിയിൽ പണമില്ലാതെ തദ്ദേശ സ്ഥാപനങ്ങളുടെ പദ്ധതി നിർവഹണം പ്രതിസന്ധിയിൽ. ജില്ലയിലെ തദ്ദേശ സ്ഥാപനങ്ങളുടെ 42.82 കോടിയുടെ ബില്ലുകളാണ് വിവിധ ട്രഷറികളിൽ കെട്ടിക്കിടക്കുന്നത്. പദ്ധതി വിഹിതത്തിന്റെ മൂന്നാം ഗഡു അനുവദിക്കാത്തതിനാൽ പുതിയ ബില്ലുകൾ ട്രഷറിയിലേക്ക് അയയ്ക്കാനാകാത്ത അവസ്ഥയുമാണ്.
ബില്ലുകൾ മാറി കിട്ടാത്തതിനാൽ പല തദ്ദേശ സ്ഥാപനങ്ങളുടെയും നിർമ്മാണ പ്രവർത്തനങ്ങളുടെ പുതിയ ടെണ്ടറുകൾ കരാറുകാർ ഏറ്റെടുക്കാത്ത അവസ്ഥയുമുണ്ട്. വിവിധ ക്ഷേമ പദ്ധതികളുടെ ബില്ലുകളും മാറാനുണ്ട്. ജില്ലയിൽ ഏറ്റവും കൂടുതൽ പദ്ധതി വിഹിതമുള്ള കൊല്ലം കോർപ്പറേഷന്റെയും ജില്ലാ പഞ്ചായത്തിന്റെയും ബില്ലുകളാണ് ട്രഷറിയിൽ ഏറ്റവും കൂടുതൽ കെട്ടിക്കിടക്കുന്നത്. ശമ്പളവും പെൻഷനും വിതരണം ചെയ്തുകഴിയുന്നതോടെ തദ്ദേശ സ്ഥാപനങ്ങളുടെ ബില്ലുകൾ മാറുന്നതിനുള്ള നിയന്ത്രണം ഒഴിവാകുമെന്നാണ് പ്രതീക്ഷ.
സാമ്പത്തിക വർഷം അവസാനിക്കാൻ കഷ്ടിച്ച് രണ്ട് മാസം മാത്രം ബാക്കി നിൽക്കേ 38.74 ശതമാനം മാത്രമാണ് ജില്ലയിലെ തദ്ദേശ സ്ഥാപനങ്ങളുടെ ആകെ പദ്ധതി ചെലവ്. ഇതിൽ പൂതക്കുളം, എഴുകോൺ, പട്ടാഴി പഞ്ചായത്തുകൾ മാത്രമാണ് 50 ശതമാനം പിന്നിട്ടത്.
പദ്ധതി ചെലവിൽ വൻ ഇടിവ്
സർക്കാരിൽ നിന്ന് പണം ലഭിക്കാത്തത് തദ്ദേശ സ്ഥാപനങ്ങളുടെ പദ്ധതി നിർവഹണത്തെ ബാധിച്ചു
കഴിഞ്ഞ സാമ്പത്തിക വർഷം ഫെബ്രുവരി 2ലെ കണക്ക് പ്രകാരം 46.84 ശതമാനമായിരുന്നു തദ്ദേശ സ്ഥാപനങ്ങളുടെ ആകെ പദ്ധതി ചെലവ്
ഈ സാമ്പത്തിക വർഷം ഫെബ്രുവരി 2വരെ പദ്ധതി ചെലവ് 35.36 ശതമാനം
ട്രഷറിയിൽ കെട്ടിക്കിടക്കുന്ന ബില്ലുകൾ കൂടി ചേർത്താലും 41.30 ശതമാനമേ ചെലവായിട്ടുള്ളു
ജില്ലയിൽ ആകെ പദ്ധതി തുക - ₹ 609.9 കോടി
ഇതുവരെ ചെലവിട്ടത് ₹ 236.3 കോടി
ആകെ - 38.74 %
പദ്ധതി ചെലവിൽ മുന്നിൽ
പൂതക്കുളം- 52.33 %
എഴുകോൺ- 51.07%
പട്ടാഴി- 50%
കൂടുതൽ തുക മാറാനുള്ള തദ്ദേശ സ്ഥാപനങ്ങൾ
കൊല്ലം കോർപ്പറേഷൻ ₹ 5.49 കോടി
ജില്ലാ പഞ്ചായത്ത് ₹ 5.51കോടി
മയ്യനാട് പഞ്ചായത്ത് ₹ 1.26 കോടി
കെട്ടിക്കിടക്കുന്ന ബില്ലുകളിൽ വലിയൊരു വിഭാഗം നിർമ്മാണ പ്രവൃത്തികളുടേതാണ്. തുക ലഭിക്കാത്തതിനാൽ ഇവ പൂർത്തിയാക്കാൻ കഴിയുന്നില്ല.
കരാറുകാർ
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |