ഏഷ്യൻ ഗെയിംസ് ജേതാക്കളുടെ നിയമന ഉത്തരവ് 24ന് കൈമാറും

കോഴിക്കോട്: ഏഷ്യൻ ഗെയിംസ് മെഡൽ ജേതാക്കളായ പി.യു.ചിത്ര, മുഹമ്മദ് അനസ്, കുഞ്ഞ് മുഹമ്മദ്, വിസ്മയ വി.കെ., നീന വി. എന്നിവരെ അസി. സ്പോർട്സ് ഓർഗനൈസറായി നിയമിച്ചുകൊണ്ടുള്ള ഉത്തരവ് 24ന് കൈമാറുമെന്ന് വിദ്യാഭ്യാസ മന്ത്രി വി.ശിവൻകുട്ടി വാർത്താസമ്മേളനത്തിൽ അറിയിച്ചു. ഒളിമ്പ്യൻ പി.ആർ. ശ്രീജേഷിനെ 24ന് തിരുവനന്തപുരത്ത് നടക്കുന്ന ചടങ്ങിൽ അനുമോദിക്കുമെന്നും മന്ത്രി പറഞ്ഞു.

സംസ്ഥാന സ്കൂൾ കായികമേള 'കേരള സ്കൂൾ ഒളിമ്പിക്സ് കൊച്ചി 24" എന്ന പേരിൽ നവംബർ നാലു മുതൽ 11 വരെ എറണാകുളത്ത് നടക്കും. ഖാദർ കമ്മിറ്റി റിപ്പോർട്ടിലെ രണ്ടാം ഭാഗത്തിൽ സാദ്ധ്യമായ കാര്യങ്ങൾ നടപ്പാക്കുകയാണ് സർക്കാർ. സ്കൂൾ തല ഏകോപനം ആരുടെയും തൊഴിലിനെ ബാധിക്കില്ല. പ്രൈമറി അദ്ധ്യാപകർക്ക് ബിരുദം നിർബന്ധമാക്കും. സെക്കൻഡറിയിൽ ബിരുദാനന്തര ബിരുദവും യോഗ്യതയായി കണക്കാക്കും. ഇത് സംബന്ധിച്ച ഖാദർ കമ്മിറ്റി ശുപാർശകൾ ഗൗരവമായാണ് സർക്കാർ കാണുന്നതെന്നും മന്ത്രി പറഞ്ഞു.