കൊല്ലം ബീച്ച്, പോർട്ട്- തങ്കശേരി തീരദേശ റോഡിൽ റീടാറിംഗിന് ആളില്ല

കൊല്ലം: ടെൻഡർ വിളിച്ചിട്ടും കോൺട്രാക്റ്റ് ഏറ്റെടുക്കാൻ ആളില്ലാത്തതിനാൽ കൊല്ലം ബീച്ച്, പോർട്ട്- തങ്കശേരി തീരദേശ റോഡ് റീടാറിംഗ് അനിശ്ചിത്വത്തിലേക്ക്. ടാറിംഗ് നീണ്ടുപോകുന്നതോടെ ഇതുവഴിയുള്ള യാത്ര കൂടുതൽ ദുഷ്കരമാണ്. ഇതേ തുടർന്ന് റീടെൻഡർ ചെയ്യാനുള്ള ഒരുക്കത്തിലാണ് അധികൃതർ. പ്രധാനമായും മത്സ്യത്തൊഴിലാളികളും തീരദേശവാസികളും ആശ്രയിക്കുന്ന റോഡിൽ പത്ത് വർഷത്തോളമായി യാതൊരു വി​ധ അറ്റകുറ്റപ്പണികളും നടന്നിട്ടില്ല. പ്രധാനമായും മത്സ്യത്തൊഴിലാളികളും തീരദേശവാസികളും ആശ്രയിക്കുന്ന റോഡിൽ പത്ത് വർഷത്തോളമായി യാതൊരു വി​ധ അറ്റകുറ്റപ്പണികളും നടന്നിട്ടില്ല. കൊല്ലം പോർട്ട്,വാടി ഹാർബർ,തങ്കശേരി ലൈറ്റ് ഹൗസ്,തങ്കശേരി ബ്രേക്ക് വാട്ടർ ടൂറിസം പാർക്ക് തുടങ്ങി വിവിധ ഇടങ്ങളിലേക്ക് പോകുന്നതിന് ദിനംപ്രതി നൂറുകണക്കിനാളുകൾ ആശ്രയിക്കുന്ന റോഡാണിത്.

 പ്രധാന കേന്ദ്രങ്ങൾ

മുദാക്കര,വാടി,കൊല്ലം പോർട്ടിന് സമീപം

 നിർമ്മാണ ചുമതല

ഹാർബർ എൻജിനിയറിംഗ് വിഭാഗത്തിന്

 കാൽനട പോലും ദുസഹം

ടാറിളകി റോഡിന്റെ പലഭാഗത്തും കുഴികൾ രൂപപ്പെട്ടിരുന്നതിനാൽ കാൽനടയാത്ര പോലും ദുസഹമായിരുന്നു​. ചിലഭാഗത്ത് കുഴി കൂടുതലായതോടെ സഹികെട്ട് നാട്ടുകാരിൽ ചിലർ മണ്ണിട്ട് മൂടാനും ശ്രമിച്ചിരുന്നു. മെറ്രലിളകി റോഡിൽ ചിതറിക്കി​ടക്കുന്നത് വലി​യ അപകട ഭീഷണി​യാണ് സൃഷ്ടിക്കുന്നത്. റോഡിന്റെ അവസ്ഥ ചൂണ്ടിക്കാട്ടി നിരവധി തവണ പരാതികൾ നൽകിയിട്ടും അനുകൂലമായ നടപടി ഉണ്ടാകുന്നില്ലെന്ന ആക്ഷേപം ശക്തമാണ്.

 നടപ്പാതകളും തകർന്നു

തീരദേശറോഡിൽ വാടി ഭാഗത്തെ നടപ്പാതകളും തകർന്ന നിലയിലാണ്. ഇന്റർലോക്ക് ഇളകിക്കിടക്കുന്നതിനാൽ നടക്കാൻ ബുദ്ധിമുട്ടാണ്. പൊളിഞ്ഞുകിടക്കുന്ന ഇന്റർലോക്കുകളിൽ തട്ടി വീണ് അപകടമുണ്ടാകാനും സാദ്ധ്യത കൂടുതലാണ്.