രാജ്യാന്തര കോടതിയുടെ ഉത്തരവ് പാലിക്കാതെ വയ്യ,​ കുൽഭൂഷൺ യാദവിന് വധശിക്ഷയ്‌ക്കെതിരെ അപ്പീൽ നൽകാം,​ ബിൽ പാസാക്കി പാകിസ്ഥാൻ

ന്യൂഡൽഹി : പാക് ജയിലിൽ കഴിയുന്ന കുൽഭൂഷൺ യാദവിന് വധശിക്ഷയ്ക്കെതിരെ അപ്പീൽ നൽകാൻ അനുമതി. . പാകിസ്ഥാൻ പാർലമെന്റിന്റെ സംയുക്ത സമ്മേളനമാണ് ഇതിനായുള്ള ബില്ലിന് അംഗീകാരം നൽകിയത്. പ്രതിപക്ഷ പ്രതിഷേധത്തിനിടെയാണ് ബില്ലിന് അംഗീകാരം നൽകിയത്. സിവില്‍ കോടതിയില്‍ അപ്പീല്‍ നല്‍കാനുള്ള വ്യവസ്ഥ ഉള്‍പ്പെടുത്തി പട്ടാള നിയമം ഭേദഗതി ചെയ്യാനുള്ള ബില്‍ സംയുക്ത സമ്മേളനം അംഗീകരിക്കുകയായിരുന്നു. വധശിക്ഷ പുനഃപരിശോധിച്ച് ഫലപ്രദമായ വിചാരണ നടത്തണമെന്ന രാജ്യാന്തര നീതിന്യായ കോടതിയുടെ നിര്‍ദേശപ്രകാരമാണ് നടപടി.

ഇന്ത്യന്‍ രഹസ്യാന്വേഷണ ഏജന്‍സിയുടെ ഏജന്റായി പ്രവര്‍ത്തിച്ച് ബലൂചിസ്ഥാനില്‍ കലാപത്തിന് ശ്രമിച്ചുവെന്ന് ആരോപിച്ചാണ് മുൻ നാവികസേന ഉദ്യോഗസ്ഥൻ കുൽഭൂഷൺ യാദവിനെ അറസ്റ്റുചെയ്തത്. 2017 ഏപ്രിലിൽ ചാരവൃത്തി ആരോപിച്ച് പാക് കോടതി വധശിക്ഷ വിധിച്ചു. ഇതിനെതിരെ ഇന്ത്യ അന്താരാഷ്ട്ര നീതിന്യായ കോടതിയെ സമീപിച്ചു. തുടർന്ന് കോടതി വധശിക്ഷ സ്റ്റേ ചെയ്‍തു. നിയമപരമായ എല്ലാ അവകാശവും ഉറപ്പാക്കണമെന്നും ഇന്ത്യൻ നയതന്ത്ര ഉദ്യോഗസ്ഥർക്ക് കുൽഭൂഷൺ യാദവിനെ കാണാനുള്ള അവസരം നല്‍കണമെന്നും കോടതി ഉത്തരവിട്ടിരുന്നു.