തട്ടിപ്പുകൾക്ക് പൂട്ടിട്ട് പൊതുമേഖലാ ബാങ്കുകൾ

മുംബയ്: പൊതുമേഖലാ ബാങ്കുകളിൽ തട്ടിപ്പുകേസുകൾ വൻതോതിൽ കുറയുന്നതായി റിസർവ് ബാങ്കിന്റെ റിപ്പോർട്ട്. 2020-21ലെ 81,921.54 കോടി രൂപയിൽ നിന്ന് കഴിഞ്ഞവർഷം (2021-22) 40,295.25 കോടി രൂപയിലേക്ക് തട്ടിപ്പുമൂല്യം കുറഞ്ഞു; 51 ശതമാനമാണ് ഇടിവ്. പൊതുമേഖലയിലെ 12 ബാങ്കുകളുടെയും സംയുക്ത കണക്കാണിത്.

കേസുകൾ 9,​933ൽ നിന്ന് 7,​940ലെത്തി. മദ്ധ്യപ്രദേശ് സ്വദേശി ചന്ദ്രശേഖർ ഗോറിന് വിവരാവകാശപ്രകാരം നൽകിയ മറുപടിയിലാണ് റിസർവ് ബാങ്ക് ഇക്കാര്യം വ്യക്തമാക്കിയത്. തട്ടിപ്പുമൂല്യത്തിൽ മുന്നിൽ പഞ്ചാബ് നാഷണൽ ബാങ്കാണ്; 431 കേസുകളിലായി 9,​528.95 കോടി രൂപ. എസ്.ബി.ഐയിൽ 4,​192 കേസുകൾ റിപ്പോർട്ട് ചെയ്‌തു; മൂല്യം 6,​932.37 കോടി രൂപ.

ബാങ്ക് ഒഫ് ഇന്ത്യ (5,​923.99 കോടി രൂപ)​,​ ബാങ്ക് ഒഫ് ബറോഡ (3,​989.36 കോടി രൂപ)​,​ യൂണിയൻ ബാങ്ക് (3,​939 കോടി രൂപ)​,​ കനറാ ബാങ്ക് (3,​230.18 കോടി രൂപ)​,​ ഇന്ത്യൻ ബാങ്ക് (2,​038.28 കോടി രൂപ)​,​ ഇന്ത്യൻ ഓവർസീസ് ബാങ്ക് (1,​733.80 കോടി രൂപ)​,​ ബാങ്ക് ഒഫ് മഹാരാഷ്‌ട്ര (1,​139.36 കോടി രൂപ)​,​ സെൻട്രൽ ബാങ്ക് (773.37 കോടി രൂപ)​,​ യൂകോ ബാങ്ക് (611.54 കോടി രൂപ)​,​ പഞ്ചാബ് ആൻഡ് സിന്ധ് ബാങ്ക് (455.04 കോടി രൂപ)​ എന്നിങ്ങനെയാണ് മറ്റ് ബാങ്കുകളുടെ മൂല്യക്കണക്ക്.

ഒരുലക്ഷം രൂപയ്ക്കുമേലുള്ള തട്ടിപ്പുകളാണ് സാധാരണയായി ബാങ്കുകൾ റിപ്പോർട്ട് ചെയ്യാറുള്ളത്. ബാങ്കുകളിൽ നിന്ന് ലഭിക്കുന്ന അധികവിവരങ്ങൾക്ക് അനുസൃതമായി (അപ്‌ഡേറ്റ്‌സ്)​ കണക്കുകളിൽ മാറ്റമുണ്ടാകാമെന്നും റിപ്പോർട്ടിൽ റിസർവ് ബാങ്ക് വ്യക്തമാക്കി.

യു.പി.ഐയിലും തട്ടിപ്പ്

യു.പി.ഐ ഇടപാടുകളിൽ തട്ടിപ്പുകൾ കൂടുകയാണെന്ന് റിസർവ് ബാങ്ക് ചൂണ്ടിക്കാട്ടുന്നു. 10,​000 രൂപയ്ക്ക് താഴെയുള്ള ഇടപാടുകളിലാണ് തട്ടിപ്പുകളേറെ. ഒരുലക്ഷം രൂപയ്ക്കുമേലുള്ള തട്ടിപ്പുകൾ ഒരു ശതമാനത്തോളം. 60 ശതമാനം തട്ടിപ്പുകൾക്കും ഇരയാകുന്നത് ശമ്പളാടിസ്ഥാനത്തിൽ ജോലി ചെയ്യുന്നവരാണ്. 75-85 ശതമാനം തട്ടിപ്പുകളും നേരിട്ടത് 45ന് താഴെ പ്രായമുള്ളവർ.