നെല്ലിന്റെ താങ്ങുവില 72 രൂപ കൂട്ടി

ന്യൂഡൽഹി: നെല്ലിന്റെ താങ്ങുവില ക്വിന്റലിന് 72 രൂപ വർദ്ധിപ്പിക്കാൻ കേന്ദ്ര മന്ത്രിസഭാ യോഗത്തിൽ തീരുമാനം. ഇതോടെ സാധാരണ ഇനത്തിന് താങ്ങുവില ക്വിന്റലിന് 2441 രൂപയായും (നിലവിൽ 2369രൂപ) ഗ്രേഡ് എ ഇനത്തിന് ക്വിന്റലിന് 2461 രൂപയായും (നിലവിൽ 2389 രൂപ) വർദ്ധിക്കും. ധാന്യങ്ങൾ, പയർവർഗങ്ങൾ, എണ്ണക്കുരുക്കൾ അടക്കം 14 മൺസൂൺ (ഖാരിഫ്) വിളകളുടെയും 2026-27 മാർക്കറ്റിംഗ് സീസണിലെ താങ്ങുവില വർദ്ധിപ്പിക്കാനും തീരുമാനിച്ചു. സൂര്യകാന്തി വിത്തിനാണ് മുൻവർഷത്തെ അപേക്ഷിച്ച് താങ്ങുവിലയിൽ കൂടുതൽ വർദ്ധന- ക്വിന്റലിന് 622 രൂപ. പരുത്തിക്ക് ക്വിന്റലിന് 557 രൂപയും നൈജർ വിത്തിന് ക്വിന്റലിന് 515 രൂപയും എള്ളിന് ക്വിന്റലിന് 500 രൂപയും വർദ്ധിക്കും.