SignIn
Kerala Kaumudi Online
Friday, 26 February 2021 7.29 PM IST

മറഞ്ഞു, മറഡോണ മഹാത്ഭുതം: ഫുട്ബാൾ ഇതിഹാസം ഡീഗോ മറഡോണ അന്തരിച്ചു

maradona

ബ്യൂണേഴ്സ് അയേഴ്സ്:പാതി​വഴി​യി​ൽ ഫൈനൽ വി​സി​ൽ മുഴങ്ങി​യ മത്സരമെന്നപോലെ,ആരാധകലോകത്തെ ഞെട്ടലി​ലാഴ്ത്തി​ ലോക ഫുട്ബാളി​ലെ പകരക്കാരനി​ല്ലാത്ത അത്ഭുത പ്രതി​ഭാസം ഡീഗോ മറഡോണ ജീവി​തത്തി​ൽ നി​ന്ന് വി​ടവാങ്ങി​. അർജന്റീന എന്ന ലാറ്റിനമേരി​ക്കൻ രാജ്യത്തുനി​ന്ന് കാൽപ്പന്തി​ന്റെ മായാജാലം കൊണ്ട് ലോകം മുഴുവൻ ആരാധകരെ സൃഷ്ടി​ച്ച,ദൈവവും ചെകുത്താനും മാറി​മാറി​ ആവേശി​ച്ച, ഒരേ മത്സരത്തി​ൽതന്നെ ദൈവത്തി​ന്റെ കൈകൊണ്ട് നേടി​യ ഗോളി​നും നൂറ്റാണ്ടി​ലെ ഏറ്റവും മി​കച്ച ഗോളി​നും ജന്മം നൽകി​യ, നായകനായി​ ലോകകപ്പ് ഏറ്റുവാങ്ങി​ ചുംബി​ക്കുകയും ലോകകപ്പ് വേദി​യി​ൽത്തന്നെ നി​രോധി​ത മരുന്നടി​ച്ചതി​ന് തലതാഴ്ത്തി​ മടങ്ങുകയും ചെയ്ത , ഇനി​യുമേറെക്കാലം ഈ ലോകത്തുവാഴണമെന്ന് ആരാധകർ പ്രാർത്ഥി​ച്ചുകൊണ്ടി​രുന്ന വി​സ്മയമായി​രുന്നു കഴി​ഞ്ഞ ഒക്ടോബർ 30ന് 60-ാം പി​റന്നാൾ ആഘോഷി​ച്ച മറഡോണ.

തലച്ചോറിലെ രക്തസ്രാവത്തി​ന് ശസ്ത്രക്രിയയ്ക്ക് വിധേയനായ ശേഷം ആശുപത്രി​ വി​ട്ട് ട്രിഗ്രെയിലെ മകളുടെ വസതിയിലായിരുന്നമറഡോണ ഹൃദയാഘാതത്തെ തുടർന്നാണ് മരണത്തി​ന് കീഴടങ്ങി​യത്.അസുഖത്തിൽ നിന്ന് മുക്തനാകുന്നുവെന്ന് ആരാധകലോകം ആശ്വസി​ക്കുന്നതി​നി​ടെയാണ് ജീവിത മൈതാനത്ത് നിന്നുള്ള മറഡോണയുടെ അപ്രതീക്ഷിത വിടവാങ്ങൽ. അർജന്റീന ഫുട്ബാൾ അസോസിയേഷൻ മറഡോണയുടെ മരണ വാർത്ത സ്ഥിരീകരിച്ചു. ഞങ്ങളുടെ ഇതിഹാസത്തിന്റെ മരണത്തിൽ അഗാധമായ ദുഃഖം രേഖപ്പെടുത്തുന്നുവെന്നും നിങ്ങൾ എപ്പോഴും ഞങ്ങളുടെ ഹൃദയത്തിലുണ്ടാകുമെന്നും അർജന്റീന ഫുട്ബാൾ അസോസിയേഷൻ അവരുടെ ഔദ്യോഗിക ട്വിറ്റർ അക്കൗണ്ടിൽ ട്വീറ്ര് ചെയ്തു.

ബ്യൂണേഴ്സ് അയേഴ്സിലെ തെരുവിൽ നിന്ന് ഇല്ലായ്മകളോട് പൊരുതി തുകൽപന്തുകൊണ്ട് ലോകം കീഴടക്കിയ കഥയാണ് മറഡോണയുടേത്. കളിക്കാരനായും മാനേജരായും ഫുട്ബാളിൽ സമാനതകളില്ലാത്ത പേരാണ് മറഡോണ.

1986ൽ മെക്സിക്കോ ലോകകപ്പി​ൽ ഒരു പറ്രം ശരാശരിക്കാരുമായെത്തി തന്റെ പ്രതിഭാവിലാസം കൊണ്ട് അർജന്റീനയെ ചാമ്പ്യൻമാരാക്കിയതോടെയാണ് മറഡോണ അമാനുഷക പ്രഭാവത്തിലേക്കുയരുന്നത്. ക്വാർട്ടറിൽ ഇംഗ്ലണ്ടിനെതിരെ ആസ്ടക്ക സ്റ്റേഡിയത്തിൽ നേടിയ രണ്ട് ഗോളുകൾ ഫുട്ബാൾ പ്രേമികൾക്ക് ഇന്നും ഒരു മരീചികയാണ്. ആദ്യ ഗോൾ ദൈവത്തിന്റെ കൈയെന്നും ഇംഗ്ലണ്ടിന്റെ ആറോളം താരങ്ങളെ ഡ്രിബിൾ ചെയ്ത് അറുപത് മീറ്രറോളം താണ്ടി നേടിയ രണ്ടാം ഗോൾ നൂറ്റാണ്ടിന്റെ ഗോളായും വാഴ്ത്തപ്പെട്ടു.

ആ ഗോളുകൾ പോലെ തന്നെ കളിക്കളത്തിനകത്തും പുറത്തും ഒരേസമയം പ്രിയപ്പെട്ടവനും വെറുക്കപ്പെട്ടവനുമായിരുന്നു മറഡോണ. അമിതമായ ലഹരി ഉപയോഗവും മുൻപിൻ നോക്കാതെയുള്ള പ്രസ്താവനകളും കളികാണാനെത്തി ഗാലറികളിൽ കാട്ടിക്കൂട്ടിയ കസർത്തുകളും അദ്ദേഹത്തെ വിവാദനായകനുമാക്കി.

1960 ഒക്ടോബർ 30ന് അർജന്റീനയുടെ തലസ്ഥാനമായ ബ്യൂണേഴ്സ് അയേഴ്സിന്റെ പ്രാന്തപ്രദേശമായ ലാനസിൽ ഡീഗോ മറഡോണ സീനിയറിന്റെയും ഡാൽമ സാൽവഡോർ ഫ്രാങ്കയുടേയും മകനായാണ് മറഡോണയുടെ ജനനം. ദാരിദ്ര്യം നിറഞ്ഞാടിയ ബാല്യകാലത്ത് ഫുട്ബാളായിരുന്നു കുഞ്ഞു മറഡോണയുടെ പ്രധാന കൂട്ടുകാരൻ. 1977 ഫെബ്രുവരി 27ന് തന്റെ പതിനാറാം വയസിൽ ഹംഗറിക്കെതിരെയാണ് മറഡോണയുടെ രാജ്യാന്തര അരങ്ങേറ്രം. 1978ൽ അർജന്റീനയെ യൂത്ത് ലോകകപ്പ് ചാമ്പ്യനാക്കി ആ അഞ്ചടി അഞ്ചിഞ്ചുകാരൻ വരവറിയിച്ചു. നാല് ലോകകപ്പുകളിൽ കളിച്ചു. 1990ലോകകപ്പിൽ അർജന്റീനയെ റണ്ണേഴ്സ് അപ്പാക്കി. 1994 ലോകകപ്പിനിടെ ഉത്തേജക പരിശോധനയിൽ പരാജയപ്പെട്ട് പുറത്തായി. 2010ൽ അർജന്റീനയുടെ പരിശീലകനായും ലോകകപ്പിനെത്തി.

JOIN THE DISCUSSION
ഇവിടെ കൊടുക്കുന്ന അഭിപ്രായങ്ങൾ കേരള കൗമുദിയുടെതല്ല. സോഷ്യൽ നെറ്റ്‌വർക്ക് വഴി ചർച്ചയിൽ പങ്കെടുക്കുന്നവർ അശ്ലീലമോ അസഭ്യമോ തെറ്റിദ്ധാരണാജനകമോ അപകീർത്തികരമോ നിയമവിരുദ്ധമോ ആയ അഭിപ്രായങ്ങൾ പോസ്റ്റ്‌ ചെയുന്നത് സൈബർ നിയമപ്രകാരം ശിക്ഷാർഹമാണ്.
TAGS: MARADONA
KERALA KAUMUDI EPAPER
TRENDING IN NEWS 360
VIDEOS
PHOTO GALLERY
TRENDING IN NEWS 360
X
Lorem ipsum dolor sit amet
consectetur adipiscing elit, sed do eiusmod tempor incididunt ut labore et dolore magna aliqua. Ut enim ad minim veniam, quis nostrud exercitation ullamco laboris nisi ut aliquip ex ea commodo consequat.
We respect your privacy. Your information is safe and will never be shared.