സെയ്ദ് മുഷ്താഖ് ട്രോഫി : കേരളം ഇന്ന് ആന്ധ്രയ്ക്ക് എതിരെ

മുംബയ് : ആദ്യ മൂന്ന് മത്സരങ്ങളിലും തകർപ്പൻ വിജയം നേടിയ കേരളം സെയ്ദ് മുഷ്താഖ് അലി ട്രോഫി ട്വന്റി-20 ടൂർണമെന്റിൽ ഇന്ന് ആന്ധ്രയെ നേരിടും. ഇന്ന് ഉച്ചയ്ക്ക് 12 മണി മുതൽ വാങ്കഡെ സ്റ്റേഡിയത്തിലാണ് മത്സരം.

ആദ്യ മത്സരത്തിൽ പുതുച്ചേരിയെ ആറുവിക്കറ്റിന് തോൽപ്പിച്ച കേരളം രണ്ടാം മത്സരത്തിൽ മുംബയ്‌യെയും മൂന്നാം മത്സരത്തിൽ ഡൽഹിയെയുംകൂടി ചേസ് ചെയ്ത് കീഴടക്കിയതോടെ ഗ്രൂപ്പിൽ ഒന്നാം സ്ഥാനത്താണ്. മുഹമ്മദ് അസ്ഹറുദ്ദീന്റെ അതിവേഗസെഞ്ച്വറിയാണ് മുംബയ്ക്കെതിരെ എട്ടുവിക്കറ്റ് വിജയം സമ്മാനിച്ചത്. ഡൽഹിക്കെതിരെ 218 റൺസടിച്ച് ചേസിംഗ് റെക്കാഡും സൃഷ്ടിച്ചു. റോബിൻ ഉത്തപ്പ(91), വിഷ്ണു വിനോദ് (71) എന്നിവരാണ് ഡൽഹിക്കെതിരെ തിളങ്ങിയത്. സഞ്ജു സാംസൺ, ജലജ് സക്സേന,സച്ചിൻ ബേബി,ശ്രീശാന്ത്,ബേസിൽ തമ്പി.കെ.എം ആസിഫ് തുടങ്ങിയ മികച്ച താരങ്ങൾ കേരള നിരയിലുണ്ട്.

ടൂർണമെന്റിൽ ഇതുവരെ വിജയം നേടാൻ കഴിയാത്ത ടീമാണ് ആന്ധ്ര. പുതുച്ചേരി, ഹരിയാന,ഡൽഹി എന്നിവരോടാണ് ആന്ധ്ര തോറ്റിരിക്കുന്നത്.

ടി.വി ലൈവ് : ഉച്ചയ്ക്ക് 12 മണിമുതൽ സ്റ്റാർ സ്പോർട്സിൽ