സൗദി വനിതകളെ വിവാഹം ചെയ്തവർക്ക് പൗരത്വം, മക്കൾക്കും ലഭിക്കും; പാലിക്കേണ്ടത് ഈ നിബന്ധനകൾ

റിയാദ്: പൗരത്വ വ്യവസ്ഥയിൽ പ്രവാസികൾക്ക് ഗുണപ്രദമായ പുതിയ ഭേദഗതിയുമായി സൗദി അറേബ്യ. സൗദി വനിതകളെ വിവാഹം ചെയ്യുന്നവർക്ക് പൗരത്വം നൽകാമെന്ന പുതിയ വ്യവസ്ഥയാണ് പ്രാബല്യത്തിൽ വന്നിരിക്കുന്നത്. കർശന നിബന്ധനകൾ പാലിക്കുന്നവർക്കാണ് പൗരത്വം നൽകുന്നത്. സൗദി കിരീടാവകാശിയും പ്രധാനമന്ത്രിയുമായ മുഹമ്മദ് ബിൻ സൽമാനാണ് ഭേദഗതിയ്ക്ക് അനുമതി നൽകിയത്.

സൗദി വനിതകളെ വിവാഹം കഴിച്ച് രാജ്യത്ത് കഴിയുന്നവർക്ക് ആശ്വാസം നൽകുന്നതാണ് ഉത്തരവ്. പൗരത്വം ലഭിക്കുന്നതിനുള്ള പ്രധാന നിബന്ധനകൾ ഇവയാണ്.

• അപേക്ഷകന് സൗദി ഇഖാമ അഥവാ താമസരേഖ ഉണ്ടായിരിക്കണം
• പത്ത് വർഷമായി സൗദിയിൽ താമസിക്കുന്നവരായിരിക്കണം
• പെരുമാറ്റ ദൂഷ്യത്തിനോ ക്രിമിനൽ നടപടികളുമായി ബന്ധപ്പെട്ടുള്ളതോ ആയ കേസുകൾ ഉണ്ടായിരിക്കരുത്
• ആറുമാസത്തിലേറെ ജയിലിൽ കഴിഞ്ഞവരാകരുത്
• അറബി ഭാഷ നന്നായി അറിഞ്ഞിരിക്കണം
• രാജ്യത്തിനാവശ്യമായ തൊഴിൽ ചെയ്യുന്നയാളാകണം എന്നിവയാണ് ചട്ടങ്ങൾ

അതേസമയം, സൗദി വനിതയുടെയും വിദേശിയായ ഭർത്താവിന്റെയും മക്കൾക്കും പൗരത്വം നൽകുന്ന ഭേദഗതിയ്ക്കും അംഗീകാരം ലഭിച്ചിരിക്കുകയാണ്. ഭരണകൂടത്തിന്റെ ഔദ്യോഗിക മുഖപത്രമായ ഉമ്മുൽഖുറയാണ് ഇക്കാര്യം പുറത്തുവിട്ടത്.

സ്വദേശിയായ മാതാവിന്റെയും വിദേശിയായ പിതാവിന്റെയും മക്കളായി സൗദിയിൽ ജനിച്ചവർക്ക് പൗരത്വത്തിനായി അപേക്ഷിക്കാം. താഴെപ്പറയുന്ന വ്യവസ്ഥകൾ പാലിച്ചിരിക്കണമെന്ന് മാത്രം.

• പൗരത്വത്തിന് അപേക്ഷിക്കുമ്പോൾ പ്രായപൂർത്തിയായിരിക്കണം
• കുറഞ്ഞത് പത്തുവർഷമായെങ്കിലും സൗദിയിൽ താമസിക്കുകയായിരിക്കണം
• നല്ല പെരുമാറ്റം ഉണ്ടായിരിക്കണം
• ആറുമാസത്തിൽ കൂടുതൽ തടവുശിക്ഷ അനുഭവിച്ചവരാകരുത്
• രാജ്യത്തിന് ആവശ്യമായ തൊഴിലിൽ ഏർപ്പെടുന്നയാളാകണം
• അറബി സംസാരിക്കാനും എഴുതാനും വായിക്കാനും അറിഞ്ഞിരിക്കണം
• അപേക്ഷിക്കുന്നയാൾ റസിഡന്റ്, പെർമിറ്റ്, പാസ്‌പോർട്ട് തുടങ്ങിയ രേഖകൾ അപേക്ഷയ്ക്കൊപ്പം ഹാജരാക്കണം.