അങ്കണവാടി ജീവനക്കാരുടെ നിയമനം തടസപ്പെടുത്തുന്നതായി പരാതി

തൊടിയൂർ: അങ്കണവാടി ജീവനക്കാരുടെ സെലക്ഷൻ ലിസ്റ്റ് നിലവിലില്ലാത്ത തൊടിയൂർ ഗ്രാമപഞ്ചായത്തിൽ വർക്കർ, ഹെൽപ്പർ തസ്തികകളിൽ സ്ഥിരം നിയമനത്തിനായി ഇന്റവ്യൂ നടത്തി സെലക്ഷഷൻ ലിസ്റ്റ് തയാറാക്കാൻ ചേർന്ന കമ്മിറ്റിയിൽ തീരുമാനമായില്ല. അഞ്ചു സാമൂഹ്യ പ്രവർത്തകരാണ് കമ്മിറ്റിയിൽ ഉണ്ടായിരിക്കേണ്ടത്. ഇതിൽ യു.ഡി.എഫിന് അർഹമായ പ്രാതിനിധ്യം നൽകിയില്ലെന്നാരോപിച്ച് യു.ഡി.എഫ് അംഗങ്ങൾ പ്രതിഷേധം ഉയർത്തിയതിനാൽ തീരുമാനം എടുക്കാതെ വിഷയം മാറ്റിവച്ചു. നിലവിൽ ഭൂരിഭാഗം അങ്കണവാടികളിലും താത്കാലിക ജീവനക്കാരാണ് ജോലി ചെയ്യുന്നത്. സ്ഥിരം നിയമനത്തിനായി 2019 മുതൽ അപേക്ഷ നൽകി കാത്തിരിക്കുന്നവരെ ഒഴിവാക്കി സ്വന്തക്കാരെ പിൻവാതിൽ വഴി നിയമിക്കാനുള്ള നീക്കമാണ് എൽ.ഡി.എഫ് നടത്തുന്നതെന്ന് പഞ്ചായത്ത് പ്രതിപക്ഷ പാർലമെന്ററി പാർട്ടി ലീഡർ തൊടിയൂർ വിജയൻ ആരോപിച്ചു. നീതിപൂർവം കാര്യങ്ങൾ നടക്കുന്നില്ലെങ്കിൽ യു.ഡി.എഫ് ശക്തമായ സമരം സംഘടിപ്പിക്കുമെന്നും തൊടിയൂർ വിജയൻ പറഞ്ഞു.