കൊല്ലം: ഐക്യമലയാള പ്രസ്ഥാനം പരവൂർ മേഖലാ കമ്മിറ്റിയുടെ ആഭിമുഖ്യത്തിൽ പാരിപ്പള്ളി ഗവ.എൽ.പി.എസിലെ നാലാം ക്ലാസ് വിദ്യാർത്ഥികൾക്ക് പകർത്തിയെഴുത്ത് മത്സരം സംഘടിപ്പിക്കും. മലയാളം അക്ഷരമാലയടക്കം അദ്ധ്യാപകർ നിർദ്ദേശിക്കുന്ന പാഠഭാഗങ്ങളാണ് പകർത്തിയെഴുതേണ്ടത്. മൂന്നാഴ്ചക്കാലം നീണ്ടുനില്ക്കുന്നതാണ് മത്സരം. അക്ഷരഭംഗി, ഓർമ്മശക്തി ,വേഗത എന്നിവ പരിഗണിച്ചാണ് വിജയികളെ നിർണയിക്കുന്നത്. വിജയികൾക്ക് കാഷ് അവാർഡുകളും ശാസ്ത്ര പുസ്തകങ്ങളും സമ്മാനമായി ലഭിക്കും. പാരിപ്പള്ളി വികസന സമിതി സെക്രട്ടറിയായിരുന്ന പി.ബാബുവിന്റെ സ്മരണാർത്ഥമാണ് മത്സരം. ഇതിന്റെ ഭാഗമായുള്ള നോട്ടുബുക്ക് വിതരണോദ്ഘാടനം ഐക്യ മലയാള പ്രസ്ഥാനം ജില്ലാ സെക്രട്ടറി അനിൽ വാസുദേവ് നിർവഹിച്ചു. കവി ബാബു പാക്കനാർ മുഖ്യപ്രഭാഷണം നടത്തി. പി.ടി.എ പ്രസിഡന്റ് നോബൽ ബാബു അദ്ധ്യക്ഷനായി. ഹെഡ്മിസ്ട്രസ് പി.സജിനി, ഐക്യമലയാള പ്രസ്ഥാനം മേഖലാ സെക്രട്ടറി എസ്.ആർ.മണികണ്ഠൻ, പ്രസിഡന്റ് കെ.ജി.രാജു, ജി.പ്രസാദ്കുമാർ, ഡോ.ആർ.ജയചന്ദ്രൻ, അജി ബാബു, അശോക് ശങ്കർ എന്നിവർ സംസാരിച്ചു.