മുടിനാരിഴപോലും തെ​റ്റ് ചെയ്തിട്ടില്ലെന്ന് മന്ത്രി ജലീൽ

തിരുവനന്തപുരം: മുടിനാരിഴപോലും തെ​റ്റ് ചെയ്തിട്ടില്ലെന്ന ഉത്തമ ബോദ്ധ്യമുള്ളതു കൊണ്ടാണ് ആരെയും കൂസാതെ മുന്നോട്ടു പോകാൻ കഴിയുന്നതെന്ന് മന്ത്രി കെ.ടി. ജലീൽ ഫേസ്ബുക്കിൽ കുറിച്ചു. ഏത് അന്വേഷണ ഏജൻസി ചോദിച്ചാലും ഇല്ലാത്തതൊന്ന് ഉണ്ടാവില്ല. സാക്ഷിയായി വിസ്തരിക്കാൻ എൻ.ഐ.എ വിളിച്ചതിനെ, തൂക്കിലേ​റ്റാൻ വിധിക്കുന്നതിന് മുമ്പ് 'നിങ്ങൾക്ക് അവസാനമായി എന്തെങ്കിലും പറയാനുണ്ടോ" എന്ന് ചോദിക്കാനാണെന്ന മട്ടിലാണ് ചിലർ പ്രചരിപ്പിച്ചത്. സധൈര്യം മുന്നോട്ടു പോകാൻ കഴിയുന്നത് ഒളിച്ചുവയ്ക്കാൻ ഒന്നുമില്ലാത്തതിനാലാണ്. പത്തൊൻപതര സെന്റ് സ്ഥലവും ഒരു വീടും ശമ്പളത്തിലെ ചെലവും കഴിഞ്ഞുള്ള ശേഷിപ്പുമല്ലാതെ മ​റ്റൊന്നും സമ്പാദ്യമായില്ല. എതിരാളികൾക്ക് എന്നെ കൊല്ലാൻ കഴിഞ്ഞേക്കും. പക്ഷേ ഒരിക്കലും തോൽപ്പിക്കാൻ കഴിയില്ല- ജലീൽ ഫേസ്ബുക്കിൽ കുറിച്ചു.