യുവാവിനെ മർദ്ദിച്ച് ബൈക്കും പണവും കവർന്ന രണ്ടുപേർ പിടിയിൽ

തിരുവനന്തപുരം: കാക്കാമ്മൂലയിൽ യുവാവിനെ മർദ്ദിച്ച് ബൈക്കും പണവും മൊബൈൽ ഫോണും തട്ടിയെടുത്ത രണ്ടുപേരെ പൊലീസ് പിടികൂടി. നേമം സ്റ്റുഡിയോ റോഡ് ചാനൽക്കര പുറമ്പോക്കിൽ മാക്കാൻ ഗിരി എന്ന ഗിരി മനോഹരൻ (21), തിരുവല്ലം മുട്ടളക്കുഴി ലക്ഷംവീട് കോളനി അമ്പു ഭവനിൽ അമ്പു (26) എന്നിവരെയാണ് നേമം പൊലീസ് അറസ്റ്റുചെയ്‌തത്. ജനുവരി 17ന് രാത്രി 8.30ഓടെയായിരുന്നു സംഭവം. ബൈക്കിൽ വരികയായിരുന്ന വെള്ളായണി സ്വദേശി ഹാജ ഹുസൈനെ (22 ) കാക്കാമ്മൂല കായലിന് സമീപത്തെ റോഡിൽ വച്ച് പ്രതികൾ തടഞ്ഞുനിറുത്തിയ ശേഷം ഹെൽമെറ്റ് കൊണ്ട് തലയ്‌ക്കടിച്ച് ബൈക്കും മൊബൈൽ ഫോണും 2500 രൂപയും തട്ടിയെടുക്കുകയായിരുന്നു. അക്രമികൾ നിരവധി ക്രിമിനൽ കേസുകളിൽ പ്രതികളാണ്. നേമം എസ്.എച്ച്.ഒ അനൂപ് കൃഷ്ണ, എസ്.ഐ ദീപു, എ.എസ്.ഐമാരായ ശ്രീകുമാർ, പത്മകുമാർ, സി.പി.ഒമാരായ ബിമൽ മിത്ര, ബിജു, അഭിറാം, ലക്ഷ്‌മണൻ എന്നിവരടങ്ങിയ സംഘമാണ് പ്രതികളെ പിടികൂടിയത്.