ഡോക്ടർമാർ പ്രതിഷേധിച്ചു

കൊച്ചി: ഡ്യൂട്ടി ഡോക്ടറെ അസഭ്യം പറയുകയും ഭീഷണിപ്പെടുത്തുകയും ചെയ്ത രണ്ട് വ്യത്യസ്ത സംഭവങ്ങളിൽ പ്രതിഷേധിച്ച് സർക്കാർ കേരള ഗവൺമെന്റ് മെഡിക്കൽ ഓഫീസേഴ്സ് അസോസിയേഷന്റെ (കെ.ജി.എം.ഒ.എ) നേതൃത്വത്തിൽ രണ്ട് മണിക്കൂർ ഒ.പി ബഹിഷ്‌കരിച്ചു. തൃപ്പൂണിത്തുറ താലൂക്ക് ആശുപത്രി, മട്ടാഞ്ചേരി വിമൻ ആൻഡ് ചിൽഡ്രൻ ആശുപത്രി എന്നിവിടങ്ങളിലെ ഡോക്ടർമാരെ കഴിഞ്ഞ ദിവസം രോഗികളുടെ കൂടെ വന്നവർ അസഭ്യം പറയുകയും ഭീഷണിപ്പെടുത്തുകയും ചെയ്‌തെന്നാരോപിച്ചാണ് പ്രതിഷേധം. തൃപ്പൂണിത്തുറ ആശുപത്രിയിലെ പ്രതിഷേധയോഗം ഡെപ്യൂട്ടി സൂപ്രണ്ട് ഡോ. ഷഫീക്കും മട്ടാഞ്ചേരിയിൽ സൂപ്രണ്ട് ഡോ. സ്മിജിയും ഉദ്ഘാടനം ചെയ്തു.