മാന്നാറിൽ പൊലീസ് നിഷ്ക്രിയം

മാന്നാർ : നാട്ടിൽ മോഷണം വ്യാപകമാകുമ്പോഴും ആവശ്യമായ നടപടികൾ കൈക്കൊള്ളാതെ മാന്നാർ പൊലീസ് നിഷ്‌ക്രിയമാവുകയാണെന്ന് ബി.ജെ.പി മാന്നാർ മണ്ഡലം കമ്മിറ്റി ആരോപിച്ചു. തിങ്കളാഴ്ച രാത്രിയിൽ നിരവധി സ്ഥലങ്ങളിൽ മോഷണം നടന്നിട്ടും പൊലീസിന്റെ അന്വേഷണം എങ്ങുമെത്തിയില്ല. ദിവസങ്ങൾക്ക് മുമ്പ് വിഷവർശ്ശേരിക്കരയിൽ രണ്ട് വീടുകളിൽ നിന്ന് സൈക്കിൾ മോഷണം പോയിരുന്നു. രണ്ടാഴ്ച മുമ്പ് കുമ്പേരൂരിൽ ഡോക്ടറുടെ വീട്ടിലും സമീപത്തെ പച്ചക്കറികടയിലും മോഷണം നടന്നു. പൊലീസിന്റെ രാത്രികാല പട്രോളിംഗ് ശക്തമാക്കണമെന്നും കഴിഞ്ഞ ദിവസങ്ങളിൽ നടന്ന മോഷണക്കേസുകളിലെ പ്രതികളെ ഉടൻ അറസ്റ്റു ചെയ്യണമെന്നും ബി.ജെ.പി മാന്നാർ മണ്ഡലം കമ്മിറ്റി പ്രസിഡന്റ് സതീഷ് കൃഷ്ണൻ ആവശ്യപ്പെട്ടു.