നെല്ല് സംഭരണം... വി​ല വർദ്ധന വാക്കി​ലൊതുങ്ങി

ആലപ്പുഴ: കേന്ദ്ര-സംസ്ഥാന സർക്കാരുകൾ മൂന്ന് വർഷത്തിനിടെ വർദ്ധിപ്പിച്ച 2.43 രൂപ ഉൾപ്പെടെ കർഷകന് ഒരു കി​ലോ നെല്ലി​ന് 30.63 രൂപ ലഭിക്കേണ്ട സ്ഥാനത്ത് നി​ലവി​ൽ ലഭി​ക്കുന്നത് 28.20 രൂപ. മൂന്നു വർഷം മുമ്പ് കി​ലോയ്ക്ക് ലഭിച്ച വി​ലയി​ൽ നി​ന്ന് നി​ലവി​ലെ വർദ്ധന 20 പൈസ മാത്രം.

2020ൽ നെല്ലിന്റെ വില കിലോയ്ക്ക് 28 രൂപയായിരുന്നു. നി​ലവി​ൽ ഉത്പാദന ചെലവ് 50 ശതമാനം വർദ്ധിച്ചു. വളം, കീടനാശിനി, തൊഴിലാളികളുടെ കൂലി​, കൈകാര്യ ചെലവ് ഉൾപ്പെടെയുള്ളവയ്ക്ക് 20 മുതൽ 70 ശതമാനം വരെ വർദ്ധനവുണ്ടായി. മൂന്ന് വർഷത്തിനിടെ കേന്ദ്രസർക്കാർ 1.71 രൂപ വർദ്ധിപ്പിച്ചപ്പോൾ സംസ്ഥാന സർക്കാർ രണ്ട് തവണയായി 72 പൈസ കൂട്ടി​. കർഷകന് ഈ തുക നൽകാൻ സർക്കാർ അന്ന് ഉത്തരവ് ഇറക്കിയതുമില്ല. സംസ്ഥാനം നൽകി വന്ന സബ്സിഡി നിറുത്തലാക്കുകയും ചെയ്തു.

മുൻ ധനമന്ത്രി ഡോ. തോമസ് ഐസക്കിന്റെ അവസാന ബഡ്ജറ്റിൽ 52 പൈസയും തുടർന്ന് കെ.എൻ. ബാലഗോപാൽ 20 പൈസയുമാണ് ബഡ്ജറ്റിൽ വർദ്ധന പ്രഖ്യാപിച്ചത്. കേന്ദ്ര ഫണ്ട് കൃത്യമായി ലഭിക്കുകയും ചെയ്തു. പക്ഷേ, തുക കൂട്ടുന്നതി​നു പകരം കുറയ്ക്കുകയാണ് സംസ്ഥാന സർക്കാർ ചെയ്തത്. 2006ലെ നെല്ല് സംഭരണ കരാറി​ൽ ക്വിന്റലിന് 25 രൂപ കൈകാര്യ ചെലവ് നി​ശ്ചയി​ച്ചപ്പോൾ 12 രൂപ കർഷകന് നൽകാമെന്ന് സർക്കാർ ഉറപ്പ് നൽകിയി​രുന്നു. ഇപ്പോൾ കൈകാര്യ ചെലവ് 250 രൂപയാണ്. പക്ഷേ, കർഷകന് നൽകുന്നത് പഴയ 12 രൂപ മാത്രം. തൊഴിലാളികളുടെ കൂലി പുരഷൻമാർക്ക് 900ൽ നിന്ന് 1050 രൂപയായും സ്ത്രീകൾക്ക് 500ൽ നിന്ന് 650 രൂപയായും വർദ്ധി​ച്ചു.

# ആവശ്യങ്ങൾ അനവധി​

നെല്ലിന്റെ താങ്ങുവില 35 രൂപയാക്കണം

കൈകാര്യ ചെലവ് 12ൽ നിന്ന് 200 രൂപയാക്കണം

സൗജന്യ വി​ത്ത് ഏക്കറിന് 40 കിലോയിൽ നിന്ന് 60 കിലോയാക്കണം

വിത്ത്, വളം, കീടനാശിനികൾക്കുള്ള സബ്സിഡി കൃത്യമാക്കണം

ഇൻഷ്വറൻസ് തുക കുടിശ്ശി​ക വിതരണം ചെയ്യണം

പമ്പിംഗ് സബ്സിഡി കാലോചിതമായി പരിഷ്കരിക്കണം

ഏക്കറിന് 500 രൂപയെന്ന പമ്പിംഗ് വി​ഹി​തം ഒഴി​വാക്കണം

.........................

നെല്ലിന് നൽകിവന്ന സബ്സിഡി തുക നിറുത്തലാക്കിയത് പുനസ്ഥാപിച്ച് താങ്ങുവില കിലോയ്ക്ക് 35 രൂപയാക്കണം. മൂന്ന് വർഷത്തി​നിടെ വിത്ത്, വളം, കീടനാശിനി, തൊഴിലാളികളുടെ കൂലി, യന്ത്രവാടക ഉൾപ്പെടെ വർദ്ധിച്ചതോടെ ഉത്പാദന ചെലവ് 50 ശതമാനം കൂടി​യത് കർഷകർക്ക് താങ്ങാനാകുന്നില്ല

ജേക്കബ് എബ്രഹാം, കേരള കോൺഗ്രസ്

കേന്ദ്ര, സംസ്ഥാന സർക്കാരുകൾ നെല്ലിനു വർദ്ധി​പ്പി​ച്ച താങ്ങുവി​ല പൂർണ്ണമായും നൽകാൻ തീരുമാനമുണ്ടാവണം. സർക്കാർ ഇപ്പോൾ ഇറക്കിയ ഉത്തരവ് പുനപരിശോധിക്കണം. കൈകാര്യ ചെലവ് 12 രൂപയിൽ നിന്ന് 200 രൂപയാക്കി​യി​ല്ലെങ്കി​ൽ പ്രത്യക്ഷ സമരം ആരംഭിക്കും

ബേബി പാറക്കാടൻ, സംസ്ഥാന പ്രസിഡന്റ്, കേരള സംസ്ഥാന നെൽനാളികേര കർഷക ഫെഡറേഷൻ

# നെല്ല് വില കിലോയ്ക്ക്

മൂന്ന് വർഷം മുമ്പ് ......................28 രൂപ

ഇപ്പോൾ.......................................28.20 രൂപ

..............................................................

#വർദ്ധിപ്പിച്ചത്

കേന്ദ്രം........................1.71 രൂപ

സംസ്ഥാനം.................72 പൈസ

...........................

കർഷകന് ലഭിക്കേണ്ടത്........... 30.63 രൂപ