കോഴിക്കോട്: വേനലവധിക്ക് വിട. കുട്ടികൾ ഇന്നു മുതൽ സ്കൂളിലേക്ക്. ക്ലാസ് മുറികളും സ്കൂൾ പരിസരവും വൃത്തിയാക്കി കുട്ടികളെ കാത്തിരിക്കുകയാണ് അദ്ധ്യാപകർ. അലങ്കാരപ്പണികളും പൂർത്തിയായി. രണ്ടു മാസത്തെ മദ്ധ്യവേനലവധിക്ക് ശേഷമാണ് സ്‌കൂളുകൾ ഇന്ന് തുറക്കുന്നത്.

പൊതു വിദ്യാലയങ്ങളിലെന്നുന്ന കുരുന്നുകളെ വരവേൽക്കാൻ വിപുലമായ പരിപാടികളാണ് സ്‌കൂളുകളിൽ സംഘടിപ്പിക്കുന്നത്. പ്രവേശനോത്സവത്തിന്റെ ജില്ലാതല ഉദ്ഘാടനം ഇന്ന് രാവിലെ 9.30ന് മെഡിക്കൽ കോളജ് ക്യാമ്പസ് ഗവൺമെന്റ് ഹയർ സെക്കൻഡറി സ്‌കൂളിൽ നടക്കും. പൊതുമരാമത്ത് ടൂറിസം മന്ത്രി പി.എ മുഹമ്മദ് റിയാസ് ഉദ്ഘാടനം ചെയ്യും. തോട്ടത്തിൽ രവീന്ദ്രൻ എം.എൽ.എ അദ്ധ്യക്ഷത വഹിക്കും.

ബ്ലോക്ക് തല പ്രവേശനോത്സവം ജില്ലയിലെ 15 ബ്ലോക്ക് റിസോഴ്സ് സെന്ററുകൾ കേന്ദ്രീകരിച്ച് നടക്കും. ജില്ലയിലെ മുഴുവൻ സ്‌കൂളുകളിലും പ്രവേശനോത്സവം സംഘടിപ്പിക്കുന്നുണ്ട്. സംസ്ഥാനതല പ്രവേശനോത്സവത്തിന്റെ ഉദ്ഘാടനത്തിന് ശേഷമാണ് സ്‌കൂളുകളിലെ പ്രവേശനോത്സവ ചടങ്ങുകൾ നടക്കുക. കുട്ടികളുടെ കലാപരിപാടികൾ, പ്രവേശനോത്സവ ഗാനത്തിന്റെ അവതരണം, മധുരവിതരണം എന്നിവയുമുണ്ടാകും.