സൗദിയിൽ നിന്ന് എത്തിയ യുവതിക്ക് ഇരട്ടക്കുട്ടികൾ

പത്തനംതിട്ട: കൊവിഡ് 19 ഭീതിക്കിടെ സൗദിയിൽ നിന്ന് പറന്നെത്തിയ യുവതിക്ക് നാട്ടിൽ വന്ന് മണിക്കൂറുകൾക്കകം ഇരട്ട കുട്ടികൾ പിറന്നു. ഇലന്തൂർ ഇടപ്പരിയാരം പാലകുന്നത്ത് വീട്ടിൽ സംഗീത (30) യാണ് രണ്ട് ആൺകുട്ടികളുടെ അമ്മയായത്. പത്തനംതിട്ട ജനറൽ ആശുപത്രിയിൽ ഇന്നലെ രാവിലെയാണ് സിസേറിയനിലൂടെ കുഞ്ഞുങ്ങളെ പുറത്തെടുത്തത്. വ്യാഴാഴ്ച രാത്രിയാണ് യുവതി സൗദിയിലെ ജിദ്ദയിൽ നിന്ന് വിമാനത്തിൽ നാട്ടിലെത്തിയത്. നെടുമ്പാശേരിയിൽ നിന്ന് ആംബുലൻസിൽ പത്തനംതിട്ട ജനറൽ ആശുപത്രിയിലെത്തിക്കുകയായിരുന്നു. അമ്മയും കുഞ്ഞുങ്ങളും സുഖമായിരിക്കുന്നു. കൊവിഡ് പരിശേധനയ്ക്ക് അമ്മയുടെയും കുട്ടികളുടെയും സ്രവങ്ങൾ ശേഖരിച്ചിട്ടുണ്ട്.