ബാങ്കിലെ പണം വീട്ടിലെത്തും, പോസ്റ്റുമാൻ സ്റ്റാറാ

ആലപ്പുഴ: പോസ്റ്റുമാൻ വഴി പണം വീട്ടിലെത്തിക്കുകയും , പോസ്റ്റ് ഓഫീസ് വഴി ബാങ്ക് അക്കൗണ്ടിലെ പണം ലഭ്യമാക്കുകയും ചെയ്യുന്ന എ.ഇ.പി.എസ് (ആധാർ എനേബിൾ‌ഡ് പേയ്മെന്റ് സിസ്റ്റം) പദ്ധതിക്ക് സ്വീകാര്യതയേറുന്നു. പെൻഷൻ തുക പിൻവലിക്കുന്നതിന് എ.ടി.എമ്മിലും, ബാങ്കുകളിലും പോകാൻ ബുദ്ധിമുട്ടുള്ളവർക്കാണ് പദ്ധതി ഏറ്റവും ഉപകാരപ്പെടുന്നത്. ബാങ്ക് അക്കൗണ്ട് ആധാറുമായി ബന്ധിപ്പിച്ചിരിക്കണം എന്നത് മാത്രമാണ് നിബന്ധന.

ബയോ മെട്രിക് സംവിധാനം വഴിയാണ് പദ്ധതി നടപ്പാക്കുക. പോസ്റ്റ് ഓഫീസിൽ ബന്ധപ്പെട്ട് ലഭിക്കേണ്ട പണത്തെക്കുറിച്ച് അറിയിച്ചാൽ പോസ്റ്റുമാൻ പണവുമായി വീട്ടിലെത്തും. തപാൽ ജീവനക്കാർക്ക് ബയോമെട്രിക് സംവിധാനം നൽകിയിട്ടുണ്ട്. ബാങ്ക് അക്കൗണ്ടുമായി ബന്ധിപ്പിച്ചിട്ടുള്ള ഫോൺ നമ്പർ പറഞ്ഞ് കൊടുത്താൽ ആ നമ്പറിലേക്ക് ഒ.ടി.പി വരും. ആ നമ്പർ ഉപയോഗിച്ച് ബയോമെട്രിക് സംവിധാനത്തിലൂടെ പണം പിൻവലിക്കാൻ കഴിയും. ഒരു ദിവസം പരമാവധി 10,000 രൂപയാണ് പിൻവലിക്കാൻ സാധിക്കുക. പോസ്റ്റ് ഓഫീസുകൾ കേന്ദ്രീകരിച്ച് പ്രവൃത്തി സമയത്താണ് ബാങ്ക് അക്കൗണ്ടിലെ പണം പിൻവലിക്കാനാവുക. ആധാർ നമ്പറും, രജിസ്റ്റേർഡ് മൊബൈലും കൈയിൽ കരുതിയിരിക്കണം.

പദ്ധതിയുടെ പ്രയോജനം

 ബാങ്കുകളിലെയും എ.ടി.എമ്മിലെയും തിരക്ക് ഒഴിവാക്കാം

 പ്രായമായവർക്ക് യാത്ര ഒഴിവാക്കാം

 എ.ടി.എം ഉപയോഗിക്കാൻ അറിവില്ലാത്തവർക്ക് ഉപകാരപ്രദം

എ.ടി.എം പോസ്റ്റുമാൻ സേവനത്തിന് മികച്ച പ്രതികരണമാണ് ലഭിക്കുന്നത്. പെൻഷൻകാരാണ് സേവനം മുഖ്യമായും ഉപയോഗപ്പെടുത്തുന്നത്. പോസ്റ്റ് ഓഫീസുകൾ വഴിയും ബാങ്ക് അക്കൗണ്ടിലെ പണം പിൻവലിക്കാൻ സാധിക്കുമെന്ന് കൂടുതൽ ആളുകൾ അറിഞ്ഞുവരുന്നതേയുള്ളു

- പോസ്റ്റ് ഓഫീസ് അധികൃതർ

................................

ഒരു ദിവസം പിൻവലിക്കാവുന്ന പരമാവധി തുക : 10000 രൂപ

പിൻവലിക്കാവുന്ന സമയം : രാവിലെ 9.30 മുതൽ വൈകിട്ട് 3.30 വരെ