ശ്രീലങ്കന്‍ ബോട്ടില്‍ കടത്താന്‍ ശ്രമിച്ച 100 കിലോ ഹെറോയിനും ആയുധങ്ങളും കോസ്റ്റ് ഗാര്‍ഡ് പിടികൂടി

ചെന്നൈ: ശ്രീലങ്കന്‍ ബോട്ടില്‍ തൂത്തുക്കൂടി തീരത്ത് എത്തിക്കാന്‍ ശ്രമിച്ച 100 കിലോ ഹെറോയിന്‍ അടക്കമുള്ള ലഹരി മരുന്ന് ശേഖരം കോസ്റ്റ് ഗാര്‍ഡ് പിടികൂടി. ഈ മാസം 17 മുതല്‍ നടത്തിയ പരിശോധനയിലാണ് ഇത്രയും ലഹരിമരുന്ന് പിടിച്ചെടുത്തത്. ആറ് ബോട്ട് ജീവനക്കാരും അറസ്റ്റിലായി. ഇവരില്‍ രണ്ട് പേര്‍ ശ്രീലങ്കന്‍ പൗരന്മാരാണ്.

പാകിസ്ഥാനിലെ കറാച്ചിയില്‍ നിന്നും എത്തിച്ചതാണ് ഇവയെന്നും പാശ്ചാത്യനാടുകളിലേക്കും ഓസ്ട്രേലിയയിലേക്കും കയറ്റിവിടുന്നതിന് കൊണ്ടുവന്നതാണെ് എന്നാണ് പ്രാഥമിക വിവരം. 99 പാക്കറ്റ് ഹെറോയിന്‍, സിന്തറ്റിക് ഡ്രഗിന്റെ 20 ചെറിയ ബോക്സുകള്‍, അഞ്ച് എം.എം പിസ്റ്റളുകള്‍, സാറ്റലൈറ്റ് ഫോണ്‍ എന്നിവയും പിടിച്ചെടുത്തവയില്‍ പെടുന്നു. ബോട്ടിലെ കാലിയായ ഇന്ധന ടാങ്കിലായിരുന്നു ഇവയെല്ലാം.

പാകിസ്ഥാന്‍ ഭീകരരെ മാത്രമല്ല, ലഹരിമരുന്നും കയറ്റിവിടുന്നുണ്ടെന്നും ഭീകരപ്രവര്‍ത്തനത്തിന് പണം കണ്ടെത്തുന്നതിനാണിതെന്നും പരിശോധനയില്‍ പങ്കെടുത്ത ഉദ്യോഗസ്ഥര്‍ പറയുന്നു. ശ്രീലങ്കന്‍ ബോട്ടിന്റെ ഉടമയെ തിരിച്ചറിഞ്ഞിട്ടുണ്ട് പാകിസ്ഥാനില്‍ നിന്ന് ലഹരിമരുന്ന അയച്ചതാരാണെന്ന് കണ്ടെത്താനുള്ള ശ്രമത്തിലാണെന്നും ഉദ്യോഗസ്ഥര്‍ പറയുന്നു.