ഭീമനാട് വെള്ളിലക്കുന്ന് ഭഗവതി ക്ഷേത്രത്തിൽ താലപ്പൊലി ആഘോഷം

അലനല്ലൂർ: വള്ളുവനാടിന്റെ ക്ഷേത്രോത്സവങ്ങൾക്ക് തുടക്കം കുറിച്ച് ഭീമനാട് വെള്ളിലക്കുന്ന് ഭഗവതി ക്ഷേത്രത്തിൽ താലപ്പൊലി മഹോത്സവം ആഘോഷിച്ചു. 67 ദിവസത്തെ കളമെഴുത്തു പാട്ടിനു സമാപനം കുറിച്ചാണ് താലപ്പൊലി ആഘോഷിച്ചത്. ക്ഷേത്രം തന്ത്രി പന്തലകോട്ടത്തു മനക്കൽ ശങ്കരനാരായണൻ നമ്പൂതിരിപ്പാടിന്റെ കാർമികത്വത്തിൽ രാവിലെ അഞ്ചരക്ക് ഗണപതി ഹോമവും താന്ത്രിക പൂജകളും നടന്നു. കാഴ്ചശീവേലി, വൈകുന്നേരം മൂന്ന് ഗജവീരന്മാരുടെ അകമ്പടിയോടെ എഴുന്നള്ളിപ്പ്, അറിയേറ്, തിരിച്ചെഴുന്നള്ളിപ്പ്, വൈകുന്നേരം ആറരക്ക് കല്ലൂർ ഉണ്ണിക്കൃഷ്ണനും സംഘവും അവതരിപ്പിച്ച മേളം എന്നിവ നടന്നു. ഇന്ന് കളംപാട്ട്, പുറത്തെഴുന്നള്ളിപ്പ്, നടുവിൽ ആൽത്തറക്ക് മുന്നിൽ അരിയേറും നടക്കും.