ഒമിക്രോൺ: വിദേശത്തുനിന്ന് എത്തുന്നവർക്ക് 14 ദിവസം സ്വയംനിരീക്ഷണം നിർബന്ധം

കോട്ടയം: ഒമിക്രോൺ റിപ്പോർട്ട് ചെയ്തിട്ടില്ലാത്ത വിദേശ രാജ്യങ്ങളിൽ നിന്ന് എത്തുന്നവരും നിർബന്ധമായും 14 ദിവസം സ്വയംനിരീക്ഷണത്തിൽ കഴിയണമെന്ന് കളക്ടർ ഡോ. പി.കെ. ജയശ്രീ പറഞ്ഞു. കൊവിഡ് അനുബന്ധ രോഗലക്ഷണങ്ങൾ കണ്ടാൽ ഉടൻ പ്രദേശത്തെ ആരോഗ്യ പ്രവർത്തകരെ അറിയിച്ച് തുടർനടപടി സ്വീകരിക്കണം. ഇവർ ഒരു കാരണവശാലും ഈ കാലയളവിൽ പൊതുചടങ്ങുകളിൽ പങ്കെടുക്കുകയോ പൊതുസ്ഥലങ്ങൾ സന്ദർശിക്കുകയോ ചെയ്യരുത്. ഒമിക്രോൺ റിപ്പോർട്ട് ചെയ്യപ്പെട്ട ഹൈ റിസ്‌ക് വിഭാഗത്തിൽപെട്ട രാജ്യങ്ങളിൽ നിന്ന് എത്തുന്ന എല്ലാവരെയും എയർപോർട്ടിൽ തന്നെ കൊവിഡ് പരിശോധന നടത്തി ഫലം നെഗറ്റീവ് ആണെന്ന് ഉറപ്പുവരുത്തിയ ശേഷമാണ് വീടുകളിലേക്ക് അയയ്ക്കുന്നത്. ഇവർ ഏഴു ദിവസം വീടുകളിൽ പൊതുസമ്പർക്കം ഒഴിവാക്കി ക്വാറന്റൈനിൽ കഴിയണം. എട്ടാം ദിവസം വീണ്ടും കോവിഡ് പരിശോധന നടത്തണം. ഫലം നെഗറ്റീവ് ആയാലും ഏഴു ദിവസം കൂടി സ്വയംനിരീക്ഷണം തുടരണം.