എം.ജി കോളേജ് കാമ്പസിൽ നളചരിതം കഥകളി

തിരുവനന്തപുരം: ഓണാഘോഷത്തോട് അനുബന്ധിച്ച് എം.ജി കോളജിൽ ഉണ്ണായിവാര്യരുടെ നളചരിതം കഥകളി വിദ്യാർത്ഥികൾക്കായി അവതരിപ്പിക്കും. നളചരിതം രണ്ടാം ദിവസത്തിലെ കലിദ്വാപരന്മാർ പുഷ്കരനെ നളനെതിരെ ചൂതു പൊരുതാൻ പ്രേരിപ്പിക്കുന്നത് മുതൽ ചൂതിൽ തോറ്റ നളൻ ദമയന്തിയോടൊത്തു കാട്ടിലേക്കു പോകുന്നത് വരെയുള്ള ഭാഗമാണ് ചൊവ്വാഴ്ച രാവിലെ അവതരിപ്പിക്കുന്നത്.

മാർഗി നടത്തുന്ന ഈ രംഗാവതരണത്തിൽ കലാമണ്ഡലം ബാലകൃഷ്ണൻ (കലി), കലാമണ്ഡലം പാർത്ഥസാരഥി (ദ്വാപരൻ), കലാമണ്ഡലം അതുൽ (പുഷ്കരൻ), മാർഗി ബാലസുബ്രഹ്മണ്യൻ (നളൻ), കലാമണ്ഡലം ജിഷ്ണു രവി (ദമയന്തി) എന്നിവർ വേഷമിടും. ഡോ.പി.വേണുഗോപാലൻ ആമുഖപ്രഭാഷണം നടത്തും.രാവിലെ 10ന് പ്രിൻസിപ്പൽ ഡോ.വി.എം. ആനന്ദ കുമാറിന്റെ അദ്ധ്യക്ഷതയിൽ കൂടുന്ന യോഗത്തിൽ പന്തളം ബാലൻ ഓണാഘോഷ പരിപാടികളുടെ ഉദ്ഘാടനം നിർവഹിക്കും.