മീങ്കര ശുദ്ധജല പദ്ധതിയുടെ പ്രധാന പൈപ്പ് തകർന്നു

കൊല്ലങ്കോട്: മീങ്കര ശുദ്ധജല പദ്ധതിയുടെ പ്രധാന പൈപ്പ് തകർന്നു. ബംഗ്ലാമേട്ടിലാണ് മീങ്കര ഡാമിൽ നിന്നും കൊല്ലങ്കോട്ടിലേക്കുള്ള ജലസംഭരണിയിലേക്ക് എത്തുന്ന പൈപ്പ് തകർന്ന് വെള്ളം റോഡിലേക്ക് തെറിച്ചത്. ഇതോടെ ഗതാഗത തടസവും ഉണ്ടായി.

കൊല്ലങ്കോട് ടൗണിൽ മീങ്കര കുടിവെള്ളം റോഡിൽ വെള്ളം പാഴാകുന്നുമുണ്ട്. അയ്യപ്പൻകാവിനടുത്തും കേരള ബാങ്കിനു മുൻവശത്തും കഴിഞ്ഞ രണ്ടാഴ്ച്ചയായി കുടിവെള്ളം പാഴാകുന്നതിനാൽ തകർന്ന പൈപ്പിന് ശേഷമുള്ള വീടുകളിലെ ശുദ്ധജല കണക്ഷനിൽ കലങ്ങിയതും ദുർഗന്ധം വമിക്കുന്നതുമായ വെള്ളമാണ് എത്തുന്നതെന്ന് നാട്ടുകാർ പറഞ്ഞു. പരിഹാര നടപടി ഉണ്ടാവാത്തതിനാൽ ഒപ്പ് ശേഖരിച്ച് കളക്ടർക്ക് പരാതി നൽകാനുള്ള തയ്യാറെടുപ്പിലാണ് നാട്ടുകാർ. യോഗിനിമാതാ ഗേൾസ് ഹൈസ്‌കൂൾ, നെടുമണി കുളം, മാഞ്ചിറ എന്നിവിടങ്ങളിലും പൈപ്പ് തകർന്ന് ശുദ്ധജലം പാഴാകുന്നുണ്ട്.